政壇：兩個住家男人超市掃貨

之前講過菁英會榮譽主席Jaime施榮忻鍾意入廚，有日傍晚時分就見佢一支公喺超市邊行邊睇，見到啱心水嘅貨品就放落購物籃，大部分都係健康有機嘅食材。記者上前同佢打招呼，佢話為咗家中小朋友健康，要嚴選食材，特別係雞肉，買不含賀爾蒙嘅比較安心。至於即食紫菜，佢就話係買嚟同老婆坐喺梳化煲電視劇嘅時候食喎！

一日後行經同一地點，又遇到大生銀行家族後人馬清揚去掃貨，但就唔見佢嘅前港姐太太錢慧儀。當日佢好有目標咁行，短短數分鐘就極速掃咗意粉、新鮮香草等食材，跟住叫工人排住隊先，自己就爭取時間行埋附近嘅貨架。行到條隊差唔多到嘅時候先返埋位畀錢，之後就同工人分道揚鑣，一個人繼續行商場。