政壇：蔣麗芸當毛細路仔

如果要搵今屆議會新人氣王，建仔Ann蔣麗芸一定榜上有名，佢入咗立法會只係短短半年，憑住惹火性格同無人能比嘅聲浪，已經有唔少事件令大眾回味。早排佢喺立會當眾同社民連長毛梁國雄對罵，更成為網上熱爆片段，最少有幾萬點擊率。事隔多日，阿Ann講番起件事仲鬼死咁勞氣，話其實香港人忍咗長毛太耐，覺得長毛只係一個唔聽話嘅細路仔。

大聲係「家族遺傳」

阿Ann話未做議員時已對長毛所作所為睇唔過眼，入到議會後更發覺唔應該容忍佢，因為香港人已「忍佢好耐」。阿Ann仲話對咗長毛幾個月，覺得佢係個細路仔，只要聽到啲唔啱聽嘅說話「就會唔happy」，然後就好似小朋友咁發爛渣。咁阿Ann又有乜方法好好「教仔」呢？點知佢話唔會教長毛，因為香港選民心水清，知道邊啲議員好邊啲唔好喎！

除咗惹火之外，講嘢大聲都係阿Ann嘅招牌之一，但原來佢咁大聲係「家族遺傳」，但唔係講緊家族基因影響，而係講緊蔣家有六個女，而佢雖然係二女，但喺家中作風一向猶如大家姐，如果講嘢太細聲，其他姊妹根本聽唔入耳，所以佢由細到大都係講得咁大聲喎。

呢個論點都幾得意，唔知阿Ann其他姊妹講嘢係咪都咁大聲呢？如果大家想睇長毛同阿Ann繼續互片，實有機會，港台今晚有個節目就搵咗佢哋上去論政，相信一定火花四濺，大家有興趣就要留意吓喇！