未曾扶貧先扶官 疊床架屋為哪般

今日係大年初一，太一叮先同讀者拜個年，祝大家龍馬精神，升職加薪，心想事成。恭喜發財！

新年新希望，唔知大家蛇年有乜願望呢？對於普羅大眾嚟講，蛇年願望不外乎安居樂業嘅啫，可惜喺富者愈富、貧者愈貧嘅環境下，咁小嘅願望都唔係咁易實現嘅咋。

嗱，成日將「民生無小事」、「急市民所急」掛喺嘴邊嘅港府，準備增設五個官職，包括喺財政司司長辦公室轄下嘅經濟分析及方便營商處，開設屬於首長薪級第二點嘅首席經濟主任。當局話係幫助政府應付扶貧工作，制訂人口政策，以及着力解決市民住屋問題喎。

據講首席經濟主任首先會領導新設嘅經濟分析組，就人口、扶貧及福利各個政策範疇，向港府提供策略性意見及訂定分析框架，又會為主要官員、局長及高層次委員會如人口政策督導委員會等，提供經濟分析及支援。人工一啲都唔平o架，月薪十三萬三千多至十四萬五千多元，連同附帶福利，涉及開支每年約二百三十萬元，簡直係超級筍工。睇嚟可以安居樂業嘅唔係普羅市民，而係呢啲官場新貴至真。

本來呢，港府增加人手處理民生尤其係扶貧問題，就算要使錢，都無可厚非嘅，問題係，首席經濟主任同現有財經官員權責差唔多，有疊床架屋之嫌，唔怪得畀人質疑係副司長嘅「還魂」及「翻版」。老實講，弱勢政府舉步維艱，動輒得咎，喺呢個時候增設高薪職位，究竟係咪明智之舉呢？好似新成立嘅金融發展局咁吖，仲未正式運作，已被指不倫不類，權責不清，仲引來無王管嘅質疑添。正所謂名不正則言不順，言不順則事不成，新官未上任已經是非多多，日後又點做實事呀？

近年港府巧立名目，不斷加開官位，陣容日益膨脹，但施政效率唔只冇提高，反而每況愈下添。呢，早前財委會先至通過撥款，為長者生活津貼加開九十個職位，可以講係未見官先打三十大板。家陣又話要增加高薪厚職搞扶貧喎，最怕未曾扶貧先扶官咋！

計太一叮話齋，官員貴精不貴多，唔係一定人多好辦事嘅，與其不斷加開官職，耗費民脂民膏，不如集中資源做多啲實事。民生問題千頭萬緒，貧窮大軍不斷增加，港府應該諗吓點樣幫助基層市民解決燃眉之急，咁先係正路吖嘛！