街坊大罵冇人性

【本報訊】「為咗封利是燒人全家好冷血啫！」天慈邨居民對於有住戶接財神後，沒有給予利是險釀滅門之禍，感到震驚，直斥狂徒「冇人性」。多名女住客均表示，前晚曾有惡形惡相少年登門派財神逗利是，部分人沒有理會，亦有住客怕麻煩，封了十元利是給對方。

住客馮女士表示，前晚有兩名金毛少年上門派財神。「兩個牛高馬大嘅男仔派財神一定有問題！我冇收就閂門！」另一女住客陳女士為免麻煩，給予十元利是，她驚聞有住戶沒有給利是被縱火報復感到驚愕，「好在我有畀錢！一睇佢哋就知唔正經」。

莫伯居於被縱火單位樓下，前晚獲悉發生火警後，立即拍門通知鄰居，然後聯同妻子及鄰居共數十人沿樓梯逃生。「二十八樓跑落嚟都幾辛苦！索晒氣呀！」他指若真有人逗利是不遂而放火燒屋，情況就十分嚴重，「如果係咁就好大件事！警方一定要徹查」。

元朗區議會主席梁志祥指，過往農曆年前亦曾有人捧桔或舞獅向商戶索取利是，部分商戶為息事寧人，會給予十至二十元利是，由於近年警方加強打擊該類不法活動，不排除有不法之徒轉移目標，上樓向住客派財神逗利是。