生活成本漲 香港居不易

年關難過年年過。龍去蛇來，再過幾日就係春節，家陣柴米油鹽樣樣貴，基層市民百上加斤，唔只年關難過，未來一年怕且都係難頂嘅喇。

呢嗱，有國際研究機構發表全球生活成本排行榜，香港短短半年內升咗八位，喺全球一百三十個城市裏面排第十四位。調查機構話喎，香港嘅排名之所以急升，主要係因為美元持續疲弱，令各類消費品價格上升，加上美國經濟復甦緩慢，預計港人嘅生活負擔會喺高位徘徊一段時間。其實，高處未算高，呢項研究仲未將居住成本計算在內，否則香港嘅排名肯定唔只十四位吖。

講開居住成本，真係一匹布咁長。前朝貪曾政府無所作為，搞到樓價長升長有，現屆政府雖然動作多多，壓抑樓市措施「成熟一項推出一項」，可惜效果適得其反，出招一次，樓價就升一次，喺咁嘅情況下，生活成本想唔上漲都幾難喇。聽講當局隨時會再次出招，不過咪畀太一叮睇死吖，結果都係一樣嘅咋。

生活成本究竟高成點？正如內地同胞話齋，豆你玩，蒜你狠，薑你軍，糖高宗，油他去……面對百物騰貴，普羅大眾嘅感覺係既悲哀，又無奈。一榮俱榮，一損俱損，講到物價上漲，通脹肆虐，香港同內地都差唔多嘅咋，甚至可能猶有過之添。

其實，紓解民困事在人為嘅啫，弱勢政府寸步難行，最大嘅優勢就係錢多，錢多好辦事吖嘛，起碼可以開倉派糖，聊解基層市民燃眉之急。會計師行就講得啱嘞，港府已經累積七千億元財政儲備，相當於二十六個月政府經常開支，淨計頭九個月就有四百億元盈餘，完全有能力派糖，例如退稅、寬減差餉、電費、水費同公屋租金等等，呢啲只係舉手之勞，問題係港府肯唔肯做。

總而言之，生活成本急上漲，開倉紓困莫遲疑。特首梁振英尋日向大家拜早年，祝全港市民蛇年身體健康、家庭幸福。希望唔好淨係得把口喇，民生無小事吖，為官者想市民幸福，最緊要攞出實際行動，幫大家排憂解難，新一年度財政預算案月底公布，財爺鬍鬚曾係唔係繼續做守財奴，七百萬人睇住o架，請好自為之吖，叮！