SUN世代：救心女強人

她不是讀醫出身，卻猶如半個醫生，牽引着無數心臟病人的生命。治療心血管疾病醫療設備公司亞太區市場總監吳愷樺，因一次機遇，放棄做商界女強人，踏進這個男性主導的冷門行業。那刻起，她從頭學習醫療知識，向醫生推廣最先進的醫療器材，十二年間拾級而上進身管理層。今天，她向年輕人道出自身的成功經驗：「做人唔好怕蝕底，學到嘢就要堅持做落去，得益嘅始終係自己。」

「呢種支架有效防止血管收窄，而呢款就可以加快血管修復……」三十三歲的吳愷樺，猶如一名心臟專家，詳細地解說各款植入心臟支架的功能。跟不少典型中產家庭一樣，她在十多歲時舉家移民澳洲，選讀最大路的金融及市場學，然而她對外國生活漸生厭倦，「嗰邊生活節奏太慢，真係好悶，所以決定返嚟。」

返港的決定，改變了她的路。「返到嚟，見咗三份工，呢份係最低職級，亦係同我讀嘅嘢最唔關事。但醫療行業係必需品，覺得前景幾好，就諗住試吓。」她原本讀商，在澳洲工作時，都是面對一堆數字﹔但偏偏這份工作需要每天進出醫院，還要熟讀大堆專業醫學名詞，「起初都覺得幾辛苦，不斷上training，了解心臟、血管構造，同埋睇醫學報告。」

就這樣，她由市場助理做起，走遍各大醫院，將最先進的心臟醫療設備推廣予醫護人員。「有次要喺九個月內，去七、八個國家嘅醫院，總結班醫生嘅意見，再寫報告決定採唔採用嗰款醫療設備。嗰次係第一次落咁大決定，好緊張。」最後，她發現該款儀器未能用於世界各地的醫院，決定不採用，而公司亦接納她的建議，肯定了其判斷。

其實，吳愷樺的家人亦患有心臟病，她的父親是其中一個。「爹哋係用第一代心臟支架，嗰時呢個技術係起步階段，發展未成熟，做手術時仲要佢簽張免責紙。我嗰時好細個，都唔知支架係咩，依家好似做咗屋企嘅醫療顧問咁，佢哋有咩心臟問題都問我意見。」

零三年沙士期間，全港醫院戒嚴，人心惶惶。雖然公司不需要員工進出醫院，但她卻堅持與醫護人員「並肩作戰」，「戴住口罩、噴埋消毒藥水照去，啲護士見到我都叫我走，但我真係唔識驚，淨係覺得佢哋為咗病人咁辛苦，至少都要精神上支持佢哋。」

這份不怕蝕底、將心比心的性格，令這名門外漢，漸獲得公司賞識，十二年間逐級跳。去年一月，她更晉升為亞太區市場推廣總監。現在，每月都要出埠參加各國的心臟研討會，但她未有埋怨，堅持投入工作，為醫生、病人尋找最好的心臟醫療設備，「我老公成日笑我有兩個屋企，另一個係公司。但呢份工可以幫到人，有好大滿足感，係令我堅持做落去嘅最大原動力。」

吳愷樺小檔案

現職：OrbusNeich亞太區市場推廣總監及香港地區經理

學歷：西澳洲大學財務金融及市場營銷商學士及市場營銷碩士

興趣：旅遊、做spa