SUN搞作：打橫嚟講：揸碌竹都無Q用

梁振英為人好性。係！係「性」，不過，乃非好色，不是「性愛」的「性」，而是愛耍「性格」的「性」。

梁先生好性之餘，也愛「好勝」，日日掛住度計要去贏人，謀算如何爭先鬥勝。

梁先生這好性好勝的能耐，令他贏得香港最高頭領的寶座，由本來明知冇行的劣境，爬前奪冠，此次歷程，讓他更心雄，更愛明知不可為的，偏就要為之，佢已目空一切。

嗱！我唔係吹水o架！梁先生呢種病態，可從佢前日高調預報攜妻遊花市，足見一斑！

舊時，民望低、乞人憎嘅前特首貪曾雀屎，明知自己犯眾怒，一出現公眾場合，總會畀人喊打，所以，佢會度條縮骨橋，即使過年作狀行花市扮親民，都唔會通知傳媒幾時去，亦唔敢去人多地廣嘅銅鑼灣維園，只會鬼鬼祟祟的閃入去九龍界限街嘅花墟，仲衰到叫新聞處玩自拍供相供片畀傳媒交差。佢自以為醒目過骨，但做人做到咁，真係好卑劣同好可憐囉！

梁振英帶住老婆出巡，唔係佢藝高人膽大喎！只是證明佢唔知碇，不了解民意咋！見佢兩公婆身邊有幾十人護駕，便知民心所向啦！

如果，梁振英咁心態唔改變，繼續當眾畀人噓，寸步難移，連老婆畀人批肘也不理，仍只顧繼續假笑搶分時，咁自欺欺人，或者只顧自己利益嘅德性，叫中央，叫港人如何再畀機會你做實事呀？買幾多支竹也不能改運的了！你話係唔係？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府