政壇：政商定格：股壇長毛被誤會發大財

政府欲以保障個人私隱為由限制公眾查閱公司董事完整身份證號碼，但前港交所董事、「股壇長毛」David Webb尋日出席一個午餐會時卻反駁，大家似乎將身份證號碼睇得太重，呢個號碼其實只係每個人嘅另一個名啫。

佢話一早發現David Webb並非佢一人專利，○七年有傳媒就報道「股壇長毛售大屋，賺租又賺價」，但呢個賺大錢嘅David Webb卻唔係佢。事實證明單憑名字辨析一個人嘅身份會有漏洞，如果當日記者有核對身份證號碼，就唔使誤中副車喇。

不過，名有相同，人亦有相似。有人就話見到David覺得似曾相識好不安，原來係諗起美劇Heroes嘅奸角Sylar，股壇長毛冇睇過Heroes，但佢話如果Sylar似佢，對方應慶幸喎！