政壇：搞搞政：鄧家彪難搣大近視形象

近視曾經困擾好多人，自從激光矯視手術面世之後，就受到好多貪靚又近視一族歡迎，工聯會勞工界議員鄧家彪（Bill）係大近視，雙眼分別有成千幾度近視，佢都曾經想做矯視，告別眼鏡，點知角膜太薄做唔到激光矯視，後尾又因為從政嘅形象所需，以致點都搣唔甩四眼仔形象。

阿Bill話，細個六、七歲睇醫生時，突然發現左眼已有六、七百度近視，右眼反而冇乜近視，當時都冇乜人解釋到點解，之後升讀中學時，佢連右眼嘅近視都直線急升，最後兩隻眼都有千幾度近視。阿Bill自爆，廿多歲時都考慮過係咪做激光矯視，但醫生話佢角膜太薄做唔到，佢跟住試過戴隱形眼鏡一排。

○六年時，佢開始入東涌做地區工作，覺得服務街坊戴副眼鏡會「老成啲」，加上當時要日以繼夜開展工作，自此就戴眼鏡至今。當問及第日會否再考慮新科技減少啲近視，阿Bill笑言，如果將來真係要考慮改變形象，先再考慮有乜新科技可以一次過做喎。