政壇：吳克儉讀貓紙回應國教

教育局局長吳克儉啱啱上任就遇上國民教育嘅風波，之後一直表現被動，引嚟唔少批評。尋日佢同傳媒提前春茗，講十五年免費教育都揮灑自如，但講到國民教育家長關注組出版嘅新書，爆料指召集人陳惜姿曾收到特首梁振英前私人助理鄭希暄電話，話代表西環約陳惜姿傾吓時，吳克儉即刻好緊張，更小心翼翼出動貓紙。

冇講誰是「前政府僱員」

吳克儉尋日有備而來，並主動話要回應國教風波，呢個時候，佢問傳媒佢可唔可以讀稿，在場者以為佢都有料爆，只見吳克儉煞有介事咁從衫袋中攞張貓紙出嚟，然後真係照稿讀，不過，答案非但冇驚喜，只係話佢同有關前政府僱員冇任何接觸，呢個「前政府僱員」係邊個，佢都冇講清楚，真係唔知佢張貓紙有乜用﹖吳局長唔係連嗰兩句說話都記唔住呀？