政壇：葉劉借「冬」風救年宵

年宵市場已經開鑼，新民黨尋日都喺維園舉行攤位開啟儀式，主席葉劉淑儀一襲紅噹噹嘅對襟唐裝襯黑色樽領長袖打底衫到場，驟睇好有過年氣氛，不過，尋日氣溫高達攝氏二十五度，猛烈陽光下，唔熱就假。着錯衫已經失算，更弊嘅卻係新民黨嘅年宵招牌貨品係暖手枕，天寒地凍賣呢啲產品一定令人感覺窩心又溫暖，但呢個春節暖笠笠，睇天氣預測到年廿九先會清涼啲，新民黨呢個年宵檔期嘅生意真係有啲危哦，葉劉睇怕要借「冬」風至得囉！

建仔剪綵變剪布

新民黨副主席田北辰同一眾男黨員就全部着淺藍色唐裝衫，大家衣着襯到絕，只係近日天氣又暖又潮濕，偏偏新民黨嘅主打年宵產品係暖手枕，同近排二十幾度嘅天氣唔多夾。同樣喺尋日開檔嘅仲有民建聯，建仔嘅開幕儀式別出心裁，佢哋將剪綵儀式嘅剪綵帶改為「剪布」，政治味好濃，似乎要宣洩建仔議員喺立法會飽受拉布折磨之苦。

另一邊廂仲有喺沙田開張嘅林健鋒、梁君彥等七名立法會議員年宵攤位，佢哋銷售嘅貨品包括應節風車，雖然創意平平，但勝在過年好意頭，銷情唔使憂。

新民黨年宵產品雖然捉錯路，但港大民意研究計劃尋日公布最新嘅行會非官守議員民望調查，葉劉淑儀就揚威喇，雖然呢次係佢入行會嘅第一個調查，但葉劉已經榮升至榜首，評分力壓行會召集人林煥光，估計同葉太建議限制奶粉出境得到市民歡心有關。

葉劉近日得到「香港第一奶媽」嘅稱號，事關政府最新限制過境者帶奶粉出境嘅措施，原建議就係來自葉劉嘅，佢建議將奶粉定為戰略儲備品以限制出境，政府接納佢條橋，但再作改良，終於推出辣招。