坐視水源倒石綿 官僚遲鈍腦積塵

有種病叫石綿肺,聽個名已經覺得恐怖。試諗吓,成個肺積滿石綿塵,仲係不治之症添,係咪得人驚先?點知,香港就係生咗一個石綿肺。

呢個石綿肺位於大欖涌水塘集水區範圍,具體部位係大帽山川龍一幅荒廢農地。病源係咁嘅,由於荒廢農地多年來無王管,慢慢就變咗泥頭堆填區,搞到沙塵滾滾大殺風景都算嘞,最離譜嘅係數以噸計嘅石綿瓦堆積如山,石綿隨時隨住大雨沖入集水區,影響本港食水安全,市民分分鐘中招!

不過講到嚇人,石綿肺係其次,政府廢至係重點。原來問題已經存在咗幾年,政府部門雖然接獲投訴,但居然齊齊耍太極,一招「四両撥黐筋」就將呢個重過千斤嘅石綿危機責任卸走晒。漁護署同規劃署話無權喺私人農地執法,環保署叫業主加強管理土地就算數,地政總署仲縮骨,一句平整填泥無違反地契就翹埋雙手唔理。直到本報近日跟進事件,環保署至話已去信要求業主兩周內妥善處理石綿堆。

叮佢個鎯鎯,官老爺嘅生理構造的確異於常人,個肺唔係用嚟呼吸,係用嚟講嘢,專講廢話!係人都知,石綿對人體危害極大,輕則令肺部永久損害,重則致癌,長時間棄置喺本港食水水源附近,又同燒烤場同家樂徑僅數步之遙,正常人都知有問題啦。官場動物對污染危機反應遲鈍,對公眾安全漠不關心,何止懵到上心口,簡直係腦積塵呀!

嗱,講到污染之害,唔止人類驚,自然界仲驚。人工石綿肺之所以被發現,全因香港昆蟲學會會長饒戈去川龍找尋「苧麻珍蝶」蹤迹,點知珍蝶搵唔到,堆填區就有一個。自從呢個苧麻珍蝶繁殖地淪為泥頭堆放地之後,珍蝶已經全面絕迹。

饒戈慨嘆:「地政總署當初正視我嘅投訴,即時搵人圍封塊地,就唔會有人掉石綿啦。」佢怒斥港府縮骨無賴,視公眾健康如糞土。

所以話,官僚機器就係一個人形石綿肺,苟且卸膊嘅陋習就好似一絲絲嘅石綿塵咁,日積月累鋪滿整個施政層面。政府肺唔止大部分呈現僵化現象,有啲甚至已經失去功能添,政府無法呼吸新氣息,香港遲早死得!

坐視水源被污染,官僚卸膊恨綿綿。梁振英政府如果真係急市民所急,有志與市民共呼吸同命運嘅話,唔使講咁多廢話,即刻展開內部除塵行動啦,叮!

第一手消息請下載on.cc東方互動iPhone/iPad/Android/Windows Phone Apps