政壇：政商定格：馮詠儀倡綠色服裝攻歐美

沙田馬場尋日呈現濃濃嘅初春氣息，事關某國際服裝品牌每年一度贊助盃賽，一改以往紫色主調，換上清新田園綠色。在場見到品牌董事總經理、利邦控股執行董事馮詠儀亦着上墨綠色連身裙，同老公林詩棋拍住拖現身。近年唔少商家都將目光轉移中國及東南亞，馮詠儀卻透露，該公司今年將會主打歐美市場。

馮詠儀話作為一個歷史悠久嘅國際品牌，長遠嚟講，鞏固歐美市場更為有利。今年服裝主調轉為綠色，佢話係因為品牌發源自板球球衣，而綠色就代表綠油油嘅球場。佢笑言唔少人話內地人唔鍾意着綠色衫，但佢認為依家內地客嘅眼光已經國際化，唔需要刻意迎合佢哋嘅口味。