政壇：搞搞政：蜜月期已過局長見真章

回顧新政府上任半年，政治炸彈無錯係好多，但大多都係針對特首CY梁振英個人，而整個社會政治氣氛雖然熾熱，但由於真正有實事做嘅決策局唔多，只要唔好口出狂言亂講嘢、或者毫無政治意識自招火頭，廚房雖熱，一班高官都未至燒成火人。但隨着施政報告出台，CY被人質疑嘅誠信問題亦已燃燒得七七八八，班高官嘅蜜月期亦同告終結。

尋日泛民遊行某程度亦反映呢個轉向，主辦單位亦預告，對民生政策嘅不滿將會形成「倒梁第二波」。究竟呢股「第二波」倒梁浪潮會否成氣候，就要視乎班高官係咪可成功推行施政報告內容，並喺民怨形成之前降溫。

政府中人話雖然施政報告未有驚為天人嘅政策出台，但總算每樣都做少少，各局長能否將每一瓣嘅「少少」好好發揮，脫穎而出，就要睇真功夫喇！即係叫班高官好瞓醒，打醒十二分精神做嘢。