政壇：曾鈺成話立會唔使測謊

全國政協委員劉夢熊前日三度發聲明，話要同特首CY梁振英同時接受測謊機考驗，睇吓邊個講大話。立法會主席曾鈺成尋日出席一個辯論比賽時，被問及立會有冇需要買番部測謊機，測吓啲議員有冇講大話，佢就話立會所有議員都講老實話，唔使測謊。至於CY同劉夢熊兩個人佢信邊個，佢就話信記者喎！

尋日嘅辯論題目係「一國兩制是保持香港繁榮穩定的最佳模式」，曾主席話，反方喺辯論時至少可以提出三種其他模式，例如一國一制、香港唔回歸，維持英國統治繼續做殖民地，或者中國人請英國人治港，即俗語所講嘅「中國做董事長，英國做總經理」。咁大逆不道？曾主席就話梗係依家嘅一國兩制最適合香港啦。