遏制搶風冇作為 港人港奶難止咳

為咗買幾罐奶粉，新界港九，東奔西走，隨時可能失望而回。唉，可憐天下父母心，今時今日做港爸港媽直頭難上加難，問你點頂！

「盲搶奶」席捲香江，市民怨聲載道。政府話就話公布咗多項穩定奶粉供應措施，包括增加供應，推出網上訂購，鼓勵市民舉報不良零售商等，同時增加打擊水貨客嘅力度，但究竟止唔止到咳，真係令人懷疑。

食物及衞生局局長高永文尋日大派定心丸，話奶粉供應可以應付季節性需求同唔正常嘅跨境需求喎。至於會唔會回應部分市民嘅訴求，倣效澳門嘅新措施，向本地家長發「奶粉卡」，憑卡每月可訂購一定數量嘅奶粉；又或者實行「港人港奶」，憑出世紙購買奶粉，佢就模棱兩可話會因應情況採取適當措施，講咗等於冇講。

嗱，唔係太一叮潑冷水，呢啲招數隨時未見其利先見其害。香港自認「購物天堂」、「旅遊之都」，居然連買奶粉都要設置重重關卡，唔單止擾民，簡直係國際大笑話。照咁嘅邏輯，今後係咪要推出港人港豉油、港人港廁紙、港人港大米呀！

講真，新措施可唔可以穩定供應，最關鍵係可唔可以落實，如果監管甩甩漏漏，大安旨意希望奶粉供應商同零售商自動自覺遵守措施，實聽撞板。

在商言商，打開門做生意，梗係愈多人幫襯愈好啦，唔通自斷米路咩。如果商家可以自律嘅，就唔會出現咁多囤積居奇，坐地起價，甚至冷待港人，專揀水貨客賣嘅怪現象喇。再講，內地需求咁大，水貨客話到明有幾多要幾多，淨係增加供應可能出現反效果，盞益晒班水貨客嘅咋。

話到尾，今次盲搶奶粉唔係單純因為供求失衡所致，咪以為增加供應就可以翹埋雙手等運到。政府要對症下藥，有所作為，除咗加強巡查力度，嚴厲打擊人為托價、選擇性售賣奶粉嘅零售商，更要同內地加強合作，喺口岸堵截同打擊水貨活動。

呢嗱，深圳市市長許勤建議深港兩地按情況變化，共同研究點樣打擊水貨走私。人哋開到聲，港府仲唔食住上？咪話太一叮唔提醒，盲搶奶導致中港矛盾進一步惡化，水貨活動由上水蔓延到全港，有團體發動「光復香港，還我奶粉」行動，今日喺港鐵旺角東站外阻截水貨客，當局繼續懶懶閒，問題隨時變成新嘅政治炸彈，叮！