SUN搞作：少膽虫手記：一死以謝天下

自從淫賤黎個腦壞咗，佢唔知聽埋啲咩坊間謠言，迷信食熊膽能醫百病，不過亂殺熊取膽，分分鐘要打靶。呢個時候，少膽虫諗到條絕橋，老屈啲熊亂咬人，仲要北上咬人……屠熊仲唔名正言順？

「少膽虫，同我入房！」淫賤黎大呼。少膽虫心懷「有紮無賠」嘅心情行入去，點知竟然見到淫賤黎黑口黑面，劈頭第一句就鬧︰「少膽虫，你又作嘢？有人漏夜發聲明反駁《爛果》，上次老屈人，我就幫你頂咗，今次你又點呀？」

面對咁嚴峻嘅情況，少膽虫臨危不亂，發揮一貫動之以情嘅吹水本色︰「老細，我在此向《爛果》全員工重申，我嘅報道絕對千真萬確！」

雖然少膽虫表情做足，但係淫賤黎仍然係半信半疑，「你講真嘅？」眼見淫賤黎落搭，少膽虫即刻加多兩錢肉緊︰「既然老細你唔信，我願意接受測謊考驗，如果我通唔過，少膽虫就由《爛果》頂樓跳下，一死以謝天下！」

淫賤黎一聽，輕輕竊笑，「少膽虫，聽到你感人嘅肺腑之言，好，就畀個機會你上天台測謊。」

上到天台，真係唔知淫賤黎喺邊拎部測謊機出嚟，仲問︰「少膽虫，你今次真係講真話？」。「係……係……」少膽虫口震震咁講。隨後，「嗶！嗶！嗶！」測謊機嘅鳴聲響徹《爛果》天台。少膽虫惟有逐步走向天台邊，「老細，可以唔跳？」少膽虫一講，驚覺今次堅大鑊，因為自己竟然唔記得淫賤黎係聽唔到個「唔」字。「既然你勇於承擔，我就幫你一把！」淫賤黎上前一踢，少膽虫即刻墮下，本來諗住死梗，好彩少膽虫咁啱跌落運番嚟嘅《爛果》回紙，小命才得以幸存……