SUN奇古怪：Sun潮語：【插爆】

成日覺得「插」呢個動詞好暴力。你諗吓，好哋哋畀人硬生生用力強行插入去，無論對方願唔願意都好，總係會覺得有啲痛。依家「插」都不特止，仲要「爆」喎！成件事即刻變得好暴力，絕對要撥入家長指引類別。

潮語「插爆」，其實唔係單單指真實嘅肢體動作。「插爆」係指言語上對另一個人嘅猛烈批評，仲可以係用激烈言論攻擊他人。依家呢個互聯網時代，人人都有自由同空間發表言論，有啲網民鍾意毫不猶豫咁「插爆」人！

例如早前「港女人情500」嘅言論，話叫啲朋友如果做500蚊人情，就唔好去飲佢嗰餐。此論一出，旋即被網民「插爆」，網民激動到話要去踩佢場，聲稱要去佢婚禮會場抗議。

另一個近期畀人「插爆」嘅例子，就係教育局局長話啲雙非學童係香港未來嘅生力軍，就算佢哋霸晒啲北區學位，都唔應該畀本地人優先。此番言論又畀大批北區家長同一啲反雙非嘅人「插爆」，仲要係圍插嗰隻。鬼叫政府根本冇一套長遠人口政策咩，局長信口開河講啲咁嘅嘢，唔畀人「插爆」就假。

做官要慎言慎行，呢啲係Common Sense。港官連呢啲基本知識都冇，香港人真係要自求多福嘞。

不過點都唔及「夢熊大師」搞笑，本來係政府大好友嘅佢，最近竟然反轉豬肚，向傳媒大爆料「插爆」特首，又話特首對佢嘅承諾唔兌現。

睇嚟呢單嘢都有排搞，我呢位小市民作為局外人，最好係買定花生等睇好戲啦喂！