政壇：黃大仙預示港政局好靈

龍年將去，近日本地政圈忽然好熱鬧，但原來一切早有預示。東方報業集團喺去年初，曾就本港政治、經濟、公共衞生同整體運勢，誠求「有求必應」嘅黃大仙指引，政治求得下下籤。到龍年尾，仲爆單全國政協委員劉夢熊被廉政公署拘捕，同疑似求官不遂爆大鑊醜聞，揭露政界中人各懷鬼胎，見利忘義，實在令人心寒。

當時本港政治求得第四十三籤下下籤，籤文為「韓文公被貶」，命理學家認為係暗示本港政治情況堪憂，港人敢言直諫，對不平事高聲疾呼，社會上較多爭拗，要喺困難重重嘅政治生態下掙扎求存。結果東方報業集團獨家揭發「貪曾」前特首曾蔭權爵士，喺任內貪盡海陸空嘅醜聞，將香港嘅廉潔基石一手摧毀，令港人痛心疾首。其後再爆出特首候選人唐英年有婚外情同九龍塘約道大宅僭建地下王宮醜聞。之後新政府官員又連番爆出不利消息。最新鮮滾熱辣嘅仲有劉夢熊事件。蛇年新政府能否轉危為機、專心施政？相信黃大仙好快會有啟示。因果報應，天理循環，龍年嘅紛亂，蛇年恐會有結論。