政壇：近千好友賀容永祺

從事保險業嘅香港專業及資深行政人員協會創會會長容永祺（Samuel），早前喺灣仔會展筵開八十圍慶祝入行三十年、拚搏多年，Samuel話除咗憑獅子山下精神賺得幾桶金外，最開心係贏得好多無價友誼。而Samuel嘅囝囝雖然係法律系畢業生，但去年都投身保險業繼承爸爸衣鉢，短短半年間仲升為壽險及財富管理高級經理。

身兼全國政協委員嘅Samuel人緣廣，多位人大、政協及政商界人士紛紛到賀，仲請到分屬好友嘅國際著名男高音莫華倫（Warren）同歌星楊千嬅擔任表演嘉賓，同Samuel相識近十年嘅Warren傾力獻唱一曲《O Sole Mio》，祝願對方前程錦繡。曾經學過三年聲樂嘅Samuel話，好崇拜Warren嘅歌藝，每當對方有表演都必定會買飛請晒一班老友去欣賞。