政壇：一舊雲拉布當絕招

特首梁振英（CY）喺施政報告宣布額外預留二十億元畀十八區區議會推展「社區重點項目」，點知泛民就疑神疑鬼，白鴿黨黃碧雲（一舊雲）上星期更喺立法會民政事務委員會上話擔心撥款會被民建聯主導，甚至變成建仔喺區議會選舉嘅政治籌碼。

撒手鐧威脅政府

一舊雲嘅言論隨即招來唔少批評，但佢一於好少理，尋日繼續搵埋成班白鴿黨區議員開記者會，要求政府改善計劃撥款程序，更拋出撒手鐧，威脅會就撥款拉布添！一舊雲話區議會聲稱會就「社區重點項目」成立獨立評審委員會，但入面冇乜泛民成員，建議搵多啲獨立或專業人士加入，以免出現利益輸送。佢仲希望啲錢用得其所，千祈唔好出現打本畀建制派建立業績。一舊雲鬧到面紅耳赤，好似泛民議員冇得受惠咁。而且若然泛民拉布，區議會要求政府加強佢哋職能嘅要求又成空。

政府要求各區議會喺三月底前提交第一輪構思計劃大綱，白鴿仔南區區議員柴文瀚就批評政府咁做係急就章，要求政府延長區議會諮詢期。其實CY喺施政報告中，都同樣要求成立十幾個委員會聆聽民間意見，但班泛民就批評佢拖得就拖，冇心解決社會問題。偏偏喺區議會做諮詢，白鴿又要求延期，咁樣又算唔算拖得就拖呢？

一舊雲又話呢個計劃本來係好事，但若當局漠視民意，畀區議會做埋啲大白象項目，立會議員或會喺財會審批撥款時提出大量質疑，搞到十八區輪流拉布。金發局一役已顯示政府幾驚拉布，一舊雲呢招嚇到人o架。