學額供不應求 雙非黑洞難填

港產官僚正一生蟲拐杖靠唔住，旨意佢哋解決問題，蚊都瞓，蛇都死喇！

嗱嗱嗱，有辦睇o架。近年跨境同雙非學童不斷湧入，北區小一學額年年供不應求，淨係上水咋，新學年學額就差近千個。教育局高官尋日承認，包括上水、粉嶺同沙頭角校網，北區今年學額短缺將達一千四百個，問你驚未？

數字冇花冇假，唔會呃人。僧多粥少之下，就算每班加幾個人，或者將所有閒置空間改為班房，一樣杯水車薪止唔到咳，搞到唔少學生焗住山長水遠跨區返學，本地家長怨聲載道。

有立法會議員建議政府透過津貼，鼓勵跨境學童留喺內地讀書。而教育局就話，難以為北區學童另訂派位機制，跨境學童喺本港冇固定地址，會將佢哋分散到八個唔同校網。最可笑係，被稱為「唔得掂」嘅教育局局長吳克儉突然貪曾上身，話雙非童係香港未來嘅人口生力軍，應獲公平對待喎。冇錯，港人唔應該歧視雙非學童，問題係本地學童又點呢？

話時話，跨境學童冇本港固定地址唔係新發現，一向如此，依家學額問題逼到埋身至祭出呢招，家長又點會收貨吖。學額短缺困擾北區多年，學校同家長年年嘈，政府年年拖，如果當局繼續頭痛醫頭，腳痛醫腳，唔對症下藥徹底解決，矛盾日積月累，遲早爆大鑊嘅咋！

講開又講，受雙非亂象衝擊嘅又何止小一派位吖。前朝曾蔭權爵士無能夾短視，對內地孕婦來港生育唔止來者不拒，仲推出政策鼓勵，話要打造所謂「教育產業」同「醫療產業」喎，導致雙非問題尾大不掉，爭完床位爭健康院，爭完健康院爭學額，爭完學額爭職位，爭完職位爭房屋，一句講晒，麻煩不斷，永無寧日。

雙非學童同本地兒童搶學額，內地水貨客就同港媽搶奶粉，中港矛盾愈演愈烈，連廣東省港區政協委員都不甘寂寞，亂噏廿四。佢哋話喎，中港矛盾因港人眼紅內地人有錢而起，如果冇共產黨，香港連水都冇得飲添。叮，佢哋唔係為中港矛盾降溫，而係挑撥離間，火上加油。

雙非問題久拖未決，已經演變成無底黑洞，遲早吸乾本港資源。咪話太一叮唔提醒，雖然前朝貪曾冇好帶挈，但呢個超爛攤子，現屆政府必須盡快處理，時日無多嘅喇，齋噏誤港，雙非黑洞唔填，香江將陷萬劫不復之地，叮！