SUN奇古怪：Sun潮語：【LGBT】

特首上個禮拜發表施政報告，傳媒、評論員、學者、前高官紛紛將呢份嘢翻來覆去解剖再解剖，搞到呢份先天不足嘅所謂施政「研究」報告更加慘不忍睹。香港依家正陷入回歸以來前所未有嘅分裂，成份報告矇矇矓矓，一味講遠景，迫在眉睫嘅嘢又冇實質解決方案，具爭議性嘅議題又提都唔提。當中「同志平權」嘅諮詢，梁特首話唔會開展，但又會繼續聆聽意見。嘩！咁即係點？又要聽但又唔諮詢，你咁矛盾嘅？

爭取「同志平權」，即係同性戀者平等權利。「同志」喺八十年代尾九十年代頭開始流行，用嚟形容男女同性戀者嘅流行用語。呢排有關同志嘅爭論，亦令「LGBT」呢個字潮番起嚟。

「LGBT」最早喺八十年代末嘅美國出現，係四種非傳統愛情及性取向嘅簡稱，呢四種關係分別係「Lesbian（女同性戀）」、「GAY（男同性戀）」、「Bisexuals（雙性戀）」及「Transgender（變性戀）」。有人亦會在LGBT後面加上一個「Q」，即「Queer」或「Questioning」，都係對自己性取向有疑惑咁解。

時至今日，「LGBT」因為受盡社會歧視，甚至喺職場或家庭受到極不公平嘅對待，長期活於痛苦之中，所以佢哋已經成為一個族群，一齊出櫃爭取平等權益。

近日有基督教團體喺添馬公園集會，反對政府開展同志平權嘅諮詢，呢班人話如果開展諮詢，就等如鼓勵同性戀。唉！愛係無罪，同志們只係爭取緊能不被歧視同享有公平對待，關佢班人叉事？又唔見佢哋落力爭取民主？問吓啫……不喜勿插！