政壇：搞搞政：西貢民政專員硬撼哪吒

西貢民政事務專員（DO）蕭慕蓮最近罕有咁高調去信西貢區議會主席，信件中以強硬字眼遺憾議員「哪吒」方國珊違規周街亂掛宣傳橫額，以及安排支持者同助理大鬧區議會。不過，哪吒反駁話係DO唔肯聽民意，唔妥佢喺高官面前示威，有心向佢政治打壓。

DO喺封遺憾信中指出，本月八日嘅會議上本來討論緊哪吒嘅違規行為，但哪吒竟然安排助理同支持者喺公眾席「大吵大鬧」，點知哪吒冇接受勸告不特止，仲親自以「恐嚇性的態度粗暴潑罵職員」，DO仲形容哪吒聲浪「傳遍整個區議會會議室」。咁嘅形容一係哪吒當時好激動，否則可能係DO誇張失實。

相信DO寫呢封信時應該愈寫愈嬲，因為連鬧人都用錯字，例如佢話哪吒用「粗卑言詞」，但應該係「粗鄙言詞」至啱。DO最後話哪吒一而再漠視法紀、無理取鬧，所以先發信遺憾佢嘅行為。

哪吒先澄清話公眾席人士只係將軍澳居民，冇一個係佢嘅助理，但係咪支持佢就好難界定。至於係咪周街亂掛宣傳橫額，佢話好多西貢區議員都係咁做，就算佢違規都已交晒罰款，唔明DO點解要選擇性針對佢，總之一句講晒，欲加之罪，何患無辭喎！