政壇：陳勇出怪招向對手偷師

新當選港區全國人大代表嘅新界社團聯會理事長陳勇，日前自爆喺九九年參選葵青區議會落葵芳邨挑戰街工梁耀忠。佢話當年初次參選好多嘢都唔識，基本上係對手做乜佢就跟住做雙倍，所以笑言認咗阿忠係半個師傅。佢又話記得有次街坊報料話阿忠搞地區旅行團，陳勇直情報名參加滲透敵方陣地偷師，佢依家諗番都覺得當時有啲瘋狂，最後佢取得近一千八百票，以一千多票之差輸咗畀阿忠。

翻查資料顯示，近四屆區議會選舉，挑戰者當中只有陳勇當年取得近一千八百票，另外三屆阿忠都大比數拋離對手勝出選舉。阿忠接受查詢時承認對陳勇有印象，但佢堅稱冇教陳勇任何嘢，但認為對方有偷師唔出奇，又佩服佢唔太介意人哋點睇。