政壇：林鄭幫襯學生年宵檔

各大年宵未開鑼，尋日已有一班中學生率先開檔，仲獲政務司司長林鄭月娥幫襯。同學仔見高官駕到，紛紛各出奇招拉客，仲有同學仔度身訂造一隻寫住林鄭英文名嘅手鈪搶客，最終呢場拉客戰有人歡喜有人愁，充分感受商場如戰場嘅滋味。

林鄭尋日滿載而歸，單係揮春就買咗四張，但揮春花款太多，搞到佢花多眼亂，呢頭拿起張「順順利利」揮春，望兩望就放番低，或者佢嫌「順順利利」唔多夠，於是就揀咗張「大吉大利」，仲買多張「桃花旺盛」添。有同學仔就諗出用百潔布變身做揮春，「揮春」擺完可以用來洗碗，但吸引唔到林鄭埋去幫襯。

世事弄人，呢邊廂有同學仔失望而回，那邊廂就有同學初做老闆太緊張，結果搞到請林鄭食檸檬。話說林鄭問同學去邊度入貨時，對方竟然話係商業機密拒絕透露喎，真係有潛質做官，但就搞到林鄭有啲尷尬。