政壇：陳浩濂倒貼做山頂議員

區議員人工少已經講咗好耐，如果撞正選區位處黃金地段，要租個幾百呎辦事處都唔係咁易，好似中西區山頂區議員Joseph陳浩濂咁，喺山頂搵咗成年都搵唔到合適舖位做議員辦事處，事關山頂區嘅物業契約零舍特別，全部商舖只准賣嘢，唔准做辦公室，惟有去中環捱貴租開檔。

最近佢喺砵甸乍街一幢商廈租咗個細單位做辦事處，已經萬多元租金，加上喺中環請職員，出手太低根本冇人肯做，所以辦事處兩位職員月薪都過萬元，加埋其他辦事處開支，已經要五萬元，扣除議員人工同實報實銷津貼，最少要貼多幾千蚊。好彩佢本身係渣打銀行投資部做董事總經理，月入十幾萬，先可以補貼區議會工作。