政壇：樹根鬧泛民冇腰骨

建制派大黨建仔周不時被人批評偏幫政府，但今個星期該黨就喺立法會被泛民主派連續針對兩次。

泛民先喺民政事務委員會質疑施政報告提出撥款二十億元畀區議會會被建仔把持，尋日財務委員會討論申請二億元撥款畀社區投資共享基金，泛民又指基金委任大批建仔成員，公文袋嘅議員更批評政府將納稅人辛辛苦苦搵番嚟嘅錢做晒「買票獎券基金」，資助建制派喺地區買票，「佢哋有幾多錢都攞咗去買票，做蛇齋餅糉基金」。

話自己從來唔講粗口

有多年區議會經驗嘅「樹根」鍾樹根睇唔過眼，即時喺個位度大叫：「條友亂嚟o架！咁講嘢都得嘅？」公文袋嘅議員就回應話：「有人心虛啫！」之後就繼續鬧話懷疑基金同建仔有利益輸送。

建仔主席譚耀宗就反駁，話該黨一直冇提名成員參加基金，亦都冇申請任何基金內嘅項目。佢話因為唔少建仔成員有豐富地區經驗，政府先會邀請佢哋加入委員會，叫啲議員唔好歧視同抹黑建仔成員。最後泛民足足鬧咗個半鐘，正當大家以為佢哋會投棄權票甚至反對票時，除咗人民力量等五個泛民議員投反對票外，其他泛民突然嚟個反高潮投晒贊成票，令撥款以四十四票贊成、五票反對大比數通過。

睇到泛民又要威又要戴頭盔，有人就聽到樹根即時爆出疑似「契弟」或「混吉」兩個字。不過，佢之後澄清當時只係講過泛民「冇腰骨」，又話自己從來都唔講粗口，希望外界唔好誤會佢喎！