幼兒教育潑冷水 議而不決得把嘴

施政報告出爐嘞！對於特首梁振英任內第一份功課，大家畀幾多分呢？睇吓邊個打分啦，如果你問幼稚園學生家長，佢哋一定不假思索就蓋上一隻黑豬印。

點解？咪係港府無解囉。明明事前吹風話落實十五年免費教育o架嘛，點知又係吹水。施政報告話喎，教育局正成立專責委員會，研究免費幼稚園教育嘅可行性喎。

有無聽錯呀，前朝政府已經話研究咯喎，家陣又話研究？研究再研究，諮詢復諮詢，以港產官僚嘅拖拉作風，等你哋研究完，博士都讀完啦！

官老爺教而不善，仲難教過啲頑劣學生。幼稚園學費年年增加，隨時仲貴過讀大學，家長擔挑愈來愈重，渴望施政報告帶來免費幼兒教育及時雨，點知一盆冷水兜頭淋。無錯，免費幼教涉及租金資助等細節，需要仔細研究，但都唔使慢條斯理成咁啩。依家至話研究可行性，跟住又要研究方案，又要諮詢公眾，俗語話百年樹人，免費幼教唔係要搞足一百年呀？

真係愈諗愈唔明，十五年免費教育係大勢所趨，澳門都一早推行咗啦，港府仲研究乜嘢呢？免費教育比學券制只係每年使多幾億元，對於坐擁幾千億財政儲備嘅政府簡直九牛一毛，官老爺仲猶豫乜嘢呢？幼兒強則國強，幼兒弱則國弱，幼兒教育好重要o架，幼童輸在起跑線上，賠上嘅唔止係學生嘅前途，更加係香港嘅前途，到時罰官老爺抄一千次「我知錯」都無用啦。

所以話啫，港產官僚真係抵打手板o架，應做嘅唔做，唔應做嘅就亂咁嚟，搞到香港教育亂七八糟。嗱，十五年免費教育拖拖拉拉，教育產業就擇惡固執，結果呢壇蘇州屎又留番畀今屆政府執手尾。施政報告係咁講嘅，經過四年推動，六大產業有若干問題需要檢討，例如醫療人手不足，教育應否作為產業看待，社會存在分歧，喺滿足本地需求同發展呢兩項產業之間亦有矛盾。「經濟發展委員會」將檢討，然後訂出建議咁話。

其實仲使乜檢討吖，教育產業一早就應該廢除啦。資助大學學位唔夠應付本地學生需求，連幼兒免費教育都搞唔掂，仲要發教育產業白日夢，根本就係捨本逐末。呢嗱，前朝政府將教育視為一盤生意吖嘛，結果高等學府紛紛淪為斂財學店，嶺南大學兩間社區學院爆出嚴重超收醜聞就係警號。

總之，教育官僚唔好再誤人子弟嘞，快快落實十五年免費教育，對教育產業撥亂反正，如果唔係，小心官場放榜嗰陣被人踢出校呀，叮！