SUN搞作：打橫嚟講：三無的《施政報告》
擒日，我真係好用心去聽梁振英演讀佢嗰份《施政報告》。對唔住，真係悶死狗！總結呢齣真人騷，係：無驚喜、無亮點、無視野的「三無」獨白。
無驚喜和無亮點，除畀梁班子早前策動的路人甲乙丙四出放風，講到大家厭煩唔想再聽之餘，《報告》內容空泛、無糖派，同埋梁先生的語言藝術（嗱！係「藝術」呀！）都是令人昏睡的原因，佢大量修辭裏，有乜乜「與眾共議」、「重中之重」、「務實為民」、「審慎處理」等等，皆是語言學裏的虛詞，抽象而冰冷，人氣不足的政治詞彙，毫無願景，打唔入民眾心底，兼絕對失分。從而看得出這份《報告》的寫手，水準九流，沒能力做好呢份工也！
無佳章不特止，連短短的佳句也欠奉，叫聽眾唔瞓着打鼻鼾，已算好彩。
梁振英先生話呢份嘢係佢呢五年的「施政藍圖」，聽嚟聽去，佢花最大氣力同篇幅的，全谷晒去房屋土地的問題上，其他的「深層次問題」，好似從未發生過咁！唔通佢睇唔到？
我相信，這幾日，坊間及傳媒將會有大量評論呢件嘢，但我想指出其中一項，無乜人留意的「深層次問題」，就係梁先生在《報告》中，只用咗三十九個字去講佢「應民所需，急民所急」的，是在經濟方面籌組一個名為「金融發展局」。
本星期一，金管局總裁陳德霖未待梁振英公布《施政報告》便撲出嚟趕派成績表，話賺咗千幾億，咁梁先生將來整個乜乜「金融發展局」又有何目的呢？千祈咪內鬥公開化呀？咪為酬庸開位呀？香港，請保重呀！
次文化考古學家，對城中潮語有深入研究，博徵博引，廢官廢人行埋一邊。
