政壇：政商定格：金管局助理總裁大執位

金管局有好幾位助理總裁，早前已傳出會有人事調動，尋日終揭盅，牽涉好多人，最令人意外嘅係，負責睇實聯匯嘅Edmond劉應彬都話辭職，更意外嘅係佢唔係跳去另一個金融機構，而係決定讀社工課程，第日唔知會唔會做埋北斗星呢？

所謂江山代有才人出，金管局呢一轉調動可謂不小，兩個助理總裁解甲離任，分別係退休嘅Nelson萬少焜，同打算重返校園嘅Edmond，金融穩定監察主管Henry鄭發就榮升助理總裁，另一個助理總裁人選就係大熱姿態入局嘅財經事務科副秘書長陳維民。

金管局總裁陳德霖都話對Edmond離開感到好可惜，而五月開始，就會由依家睇機構拓展及營運嘅助理總裁Howard李達志接佢個位，新加入金管局嘅陳維民就四月中開始接Howard個位，負責同傳媒打交道。