政壇：搞搞政：黃友嘉公職爆燈謀減磅

睇過政府早前委任新一批諮詢委員會成員嘅名單，其中廉政公署社會關係市民諮詢委員會、紀律人員薪俸及服務條件常務委員會委員名單上，唔見咗中華廠商聯合會前會長黃友嘉個名，惹嚟外界揣測佢因「唐營」身份而被炒魷。面對傳言，佢就話：「我至今已有六項公職，爆晒燈，唔辭咁啲點得呀！」

除剛啱當選港區全國人大代表外，佢仲身兼扶貧委員會社會參與專責小組主席、經濟發展委員會籌備小組成員、土地及建設諮詢委員會主席、破產欠薪保障基金委員會主席、外匯基金諮詢委員會委員，加埋浸會大學校董，名副其實公職爆晒燈，難怪要辭咁啲減磅喇。

以扶貧委員會公職為例，佢近排頻頻會見唔同慈善團體、社福界代表同商界領袖，傾吓點樣藉商界參與，加大扶貧力度。雖然政府冇指定要佢幾時交功課，但佢笑言「時間無多」，事關二月係農曆新年，三月又要上北京開人大會議，所以啲工作要逼埋呢幾星期一齊做喎！