政壇：楊駿業素食陣饗有緣人

富二代David楊駿業近期積極推動嘅周一素食運動，啟動短短八個月，茹素人士數目激增。踏入新一年，佢再下一城，早前舉辦首個素食講座，邀請包括魏華星、「手襪女皇」林曉盈同舞台劇演員彭秀慧等名人分享素食心得，又擺下「素食陣」，出爐素Pizza、素串燒、素沙律，仲有蘑菇素湯，任吃任試，吸引五百多人出席。

反應咁好，難怪David計劃將素食文化帶到內地。佢之所以希望將「綠色訊息」帶到內地，原來早前佢同清華大學代表講起想喺校內飯堂推出素食餐單，校方都話好支持。稍後會邀請埋北京大學同陝西師範大學加入「素食兵團」，預計下半年就會成事，若然內地學生都加入，呢個「素食兵團」認真唔講得笑喎。