政壇：葉禮德媽咪 誤解大狀威啲

大律師同事務律師雖然屬於兩個唔同嘅專業分支，但就因為一個「大」字之差，令人誤以為兩者有高低之分，連律師會會長Dieter葉禮德嘅媽咪都有呢個誤解。

Dieter前幾日喺一個公開場合話，經過十年爭取，律師終於有機會喺高等法院、上訴法院同終審法院出庭發言，可惜「歧視」問題並非可以一朝一夕解決，事關喺公眾心目中，律師專業嘅認受性始終不及大律師，佢話自己亦曾多次被外行人問佢幾時先至會「升職」做大律師！

但最令佢沮喪嘅係，原來連佢媽咪都搞唔清楚兩者分別。回想當日佢滿心歡喜向媽咪宣布獲選為律師會會長，但葉媽媽不但唔覺得開心，仲好失望問點解阿仔執業多年仲未「滿師」升級做大律師，仲話佢朋友個孫女二十五歲就做到大律師嘞，搞到佢哭笑不得。

如果葉媽媽知道阿仔最近做埋廣東省政協，唔知又會係驚喜定失望呢？