政壇：林大輝同新民黨拍散拖

雖然林大輝係工業界功能界別議員，一向有意轉戰地區直選，而佢多年來做咗唔少地區工作，本身都儲落唔少樁腳，尤其喺沙田區更有唔少「親兵」，所以佢早前主動放風話想加入政黨。近年銳意大展拳腳嘅新民黨，當然好想吸納大輝入黨啦，而大輝亦覺得新民黨條路線有得發圍，可以跟大隊暢所欲言鬧政府，為將來直選鋪路。

但聽聞大輝覺得新民黨喺新界東冇樁腳幫佢，反而自己嘅「親兵」仲多過對方，計落條數暫時冇乜着數，所以一直吊住該黨主席葉劉淑儀癮，既冇話唔入黨，亦冇話入黨，總之拖得一時得一時。有政界中人形容，佢哋雙方目前仍然係「拍拖」關係，最後能否拉埋天窗，就好睇大輝點決定喇。雖然依家拍緊散拖，但萬一葉劉搵到好人選落戶新界東插旗，咁大輝就因住「蘇州過後冇艇搭」呀！