政壇：長毛疊水霸公屋

做咗咁多年立法會議員，仲住緊公屋嘅社民連主席「長毛」梁國雄，一直被外界質疑係公屋富戶。咁啱新一份《施政報告》話要加強取締濫用公屋嘅人士，即係話有錢嘅唔該快啲搬走，騰空間公屋畀有需要人士。長毛隨即自爆話早前政府派人審查佢個銀行戶口，仲上門做「家訪」，唔知係咪想踢走佢喎，好在佢成副身家都係得九萬元，繼續符合住公屋資格。其實長毛一直走緊灰色地帶，只係佢唔肯認啫！

政府不時會派人審查公屋住戶，睇吓當中邊個係富戶，有發現就叫有關住戶即刻搬走。長毛做咗咁多年議員，每個月都至少七萬多元人工，連埋其他津貼都唔少錢，所以有人批評佢霸住間公屋，而政府懷疑佢係公屋富戶都好合理。

收入過畀社民連

長毛辯解話咁多年嚟一直有交雙倍租金，而成副身家亦只得九萬元，有排都未超過六十萬元嘅資產上限，完全符合政府準則，點解唔可以繼續住公屋喎。老實講，雖然佢銀行存款得九萬元，但點解咁多年都只係得咁少儲蓄，其實唔難理解。

大家都知長毛收入唔差，而佢每個月都會將好大筆錢轉畀社民連，用作支援社民連嘅街頭運動，雖然佢唔係落自己袋，唔算有私心，但呢招變相轉移資產講唔講得通，公眾自有判斷啦。講到尾，公屋究竟係畀使大咗嘅有錢人住，定係畀收入低嘅市民住，長毛心中有數，依家搵咁多錢仲住緊公屋，的確無違規，但話佢走灰色地帶，應該冇乜人反對。