流感肆虐陣腳亂 醫護不足怎防疫

屋漏偏逢連夜雨，公立醫院人手本來已經緊張嘅喇，加上流感病人急增，跟住仲係新春長假期添，急症室好似倒瀉籮蟹咁。醫管局無計可施，打算喺部分急症室推行所謂先導計劃，招募其他部門醫護人員到急症室兼職，協助診治次緊急及非緊急病人，預計招聘數十人，分擔急症室一成工作量；仲話如果效果理想，將會擴展至全港急症室喎。

嗱，姑勿論先導計劃究竟行唔行得通，太一叮可以肯定講句，如果公立醫院人手緊張嘅情況冇改善，仲係十個煲七個蓋，乜嘢計劃都係假。就以伊利沙伯醫院嚟講，急症室部門原本有三十七名醫生，去年七月起先後有兩名醫生退休或轉投私營市場，連同原先空缺，共欠三名醫生，空缺率達百分之八，搞到有啲病人要等足八個小時，由夜晚坐到天光先至獲得診治，就算冇病都等到有病喇。

正如有人話齋，所謂急症室先導計劃根本得啖笑，家陣個個部門都人手緊張，喺內部招聘醫護人員去急症室頂檔，即係要減少其他部門嘅服務，咁豈不是亂上加亂？再講吖，唔少前線醫護人員日常工作量已經超負荷，仲有幾多人肯到急症室兼職，實在令人懷疑。

講番流感，真係唔係開玩笑o架，病毒勢兇夾狼，美國近五十個州被攻陷，過百人死亡，紐約更宣布進入公共衞生緊急狀態，疫苗賣到斷晒市。病毒無國界，遲早輪到香港嘅咋。嗱嗱嗱，香港流感高峰期仲未到，醫院急症室已經亂成咁，遲啲高峰期殺到，都唔知點樣應付。最弊嘅係，醫學會調查指只有一成四受訪者去年有接種流感疫苗，好多人自認身體好唔怕被感染喎。港人防疫意識咁薄弱，萬一香港好似美國流感大爆發，後果真係不堪設想。

總而言之，防疫寧緊勿鬆吖。流感高峰期就快殺到，市民固然要提高警覺，加強防範，而醫管局更加要打醒十二分精神，唔好再渾渾噩噩。老實講，以家陣急症室七國咁亂嚟睇，市民對醫管局真係冇乜信心，只能自求多福嘅咋，叮！