政壇：政商定格：何志恩堅持個人設計風格
內地消費市場龐大，商人設計產品時難免會迎合內地消費者口味，但著名時裝設計師Johanna何志恩尋日出席一個分享會時話，堅持唔會因此而改變個人設計風格。佢坦言喺商業同理想之間確實難以取得平衡，但如果連自己嘅設計都被人牽住鼻子走，就會失去個性，同一個普通品牌無異，所以若要建立一個成功品牌，首要條件就係要堅守個人嘅獨特之處。
何志恩堅持唔會為商業而改變個人設計風格。
Johanna覺得現今嘅設計風氣已經唔同咗，以前時裝設計師創造嘅，係一個天馬行空、玩味十足嘅「夢」，只會喺時裝騷「天橋」上見到，基本上唔着得出街。依家則反而受消費者啟發，趨向現實主義，唔少國際服裝品牌嘅設計相對保守，而佢就希望跳出只為明星做形象設計嘅框框，為真實嘅大眾設計服裝。
