政壇：政商定格：國泰一姐參觀飛機廠結緣
唔講唔知，原來上任冇耐嘅國泰航空企業事務董事Chitty張鳳婷，讀書時已經同航空業有一段淵源。佢話到讀大學一年級先第一次坐飛機，仲係自己一個人飛去西雅圖，當時不知幾興奮，咁啱有個同學嘅爸爸喺飛機生產商波音公司工作，帶咗佢去參觀波音飛機廠，見到啲飛機嘅裝嵌過程，令佢大開眼界，仲立志要投身航空業添！
張鳳婷話「空中之旅」可讓基層小朋友一嘗遊飛機河嘅滋味。（資料圖片）
闊別四年嘅國泰「空中之旅」活動再度推出，喺今個月二十七號舉行，Chitty話邀請來自東涌、元朗同觀塘等二百幾個單親兼低收入家庭的小朋友，同屋企人一齊坐飛機，圍繞香港飛行，等佢哋可以感受吓遨遊天際嘅樂趣。
