特首CY梁振英每逢到立法會都引來大批示威者,有人爆料話社民連利用立法會秘書處漏洞,申請過百張職員證,然後派畀義工,等佢哋可以喺議事廳外四處游走,極容易向CY舉牌示威。咁咪搞到立會好似無掩雞籠咁?

設計圖片及對白

如果係手持職員證,照計立會保安都唔可以趕佢哋走,至於持訪客證嘅外來人士亦有好大自由度,但唔可以上議員辦公室,亦唔可以擾亂立法會秩序。社民連主席梁國雄(長毛)話根本冇申請過咁多張職員證,但承認近期有幫班義工申請訪客證,秘書處有晒紀錄,仲話訪客都係人,都有權利示威,如果啲訪客不滿CY,點解唔可以示威呢?

立會行政管理委員會尋日就討論上述問題,建制派當然唔滿意社民連咁玩法,但泛民就好支持,尤其係白鴿黨主席劉慧卿,話議員助理示威都係工作範圍之一喎!金融界吳亮星聽到,鬧爆卿姐咁做即係「知法犯法,罪加一等。」究竟社民連今日會唔會再用呢招向宣讀施政報告嘅CY示威,而立會保安又有乜應對,今日就會揭曉。

第一手消息請下載on.cc東方互動iPhone/iPad/Android/Windows Phone Apps