政壇：象哥密謀搵自己人接班

話說象哥代表嘅中華出入口商會（中出），今年啱啱選出新一屆常務會董，發現本身唔係做廠商嘅青年建仔主席周浩鼎榜上有名，聽聞係獲象哥一手提拔，而象哥對外仲猛讚佢係自己嘅左右手，莫非暗示緊畀佢接班？建仔係咪又想將中出個議席據為己有呢？

過往象哥一直都想由前議員許長青囝囝許華傑接棒，但佢依家特登提拔周浩鼎加入中出做常務會董，即時惹人揣測。周浩鼎好坦白話日後嘅嘢冇人會知，但目前會跟住象哥學嘢，因近年做埋建仔工商事務政策副發言人，要同商會人士多多溝通，咪順理成章做埋中出會董囉。到底象哥想許華傑定係周浩鼎接棒，相信過多一年就清晰啲。

再講，中出今年會同海南商會首次贊助農曆新年嘅煙花匯演，叫做幫中出打響頭炮。據聞煙花加埋激光元素，呢個技術過去未試過喺香港出現，估計費用最少要過千萬元。