政壇：傳中央挺CY整頓地產業
全國人大副委員長李建國，前日向喺港區人大代表迎新會中發表書信，明確要求唐、梁營人士放下分歧，攜手支持特首CY梁振英同特區政府依法施政。呢番話其實唔只要講畀本港建制派聽，亦係向喺特首選舉後一直拒絕「歸隊」支持CY嘅地產商放話。有消息更指CY早前上京述職時，獲國家主席胡錦濤親口支持佢「整頓」香港地產業，因此佢先夠膽喺買家印花稅方面企得咁硬。
CY上台後表明要大增土地同房屋供應，又推出買家印花稅等「辣招」打擊樓市炒風，自然引起部分地產商不滿，其中地產建設商會更揚言暫停所有私人重建項目，務求迫使政府讓步。
如果換咗係貪曾仲做緊特首，佢實畀班地產商嚇到腳軟，即時跪低撤回有關措施，但CY至今都企得好硬，原來係因為背後有阿爺力撐。消息指CY上月中喺北京會見胡錦濤時，胡主席忽然問佢點睇香港地產業，CY就一口氣用咗二十五分鐘詳述本港地產業嘅種種問題，以及佢有乜大計同措施處理，之後胡主席簡單回應咗一句：「那就按照你所說的去辦！」
就憑此一問一答，其他負責港澳事務嘅領導人同官員都立即明白，CY嘅土地房屋政策已得到中央最高領導人首肯，其他人同利益集團唔使再向中央打小報告嘞。
