政壇：旅發局帥位爭崩頭

旅發局主席一職近年來都係富貴黨天下，先有周梁淑怡後有田少接棒，有業界消息指，富貴黨最近疑似先下手為強，有意想搵該黨零售批發界議員方剛做田少接班人。

基本要求英文良好

究竟係咪適合人選就見仁見智，但有人形容再由富貴黨中人接掌旅發局，只會令旅發局更加似該黨嘅「私產」，「世襲」呢個公職，呢個印象對各方都冇好處，因此聽聞本身係盛事基金評審委員會主席嘅林健鋒，都蠢蠢欲動又想同富貴黨唱對台戲，想爭旅發局主席嚟做。

有消息指林健鋒嘅最大優勢係行會成員，可以名正言順幫政府睇實呢個曾經畀人大鬧係「大花筒」嘅法定機構，唯一缺點係佢依家非旅發局成員，突然「空降」做主席未知會否引起反彈。

近日「梁粉」不時獲公職垂青，被業界公認係「梁粉」嘅旅遊界選委葉慶寧會否有機會做呢？消息人士形容，旅發局要出外推廣香港旅遊，良好嘅英文係基本要求，但據聞葉慶寧嘅英文麻麻地，所以應該機會唔大喎。不過有人提醒，難保最後一刻有「梁粉」會突圍而出，所以邊個做旅發局主席一職仲係變數多多喎，真係未到最後一刻都唔知鹿死誰手。