旅社頻執笠 監管多甩漏

開講有話，讀萬卷書不如行萬里路。放假遊埠，見識異國風情，本來係賞心樂事，之但係，一個唔好彩撞正旅行社執笠，遊埠變遊蕩，咁就掃興喇。

唔係講笑o架，繼信成假期忽然倒閉後，星級假期亦因財務問題被釘牌，受影響旅客大約一千九百人，涉及款項二百八十萬元。連日來，唔少旅客上門追討團費，而職員就一味耍手擰頭，叫佢哋向旅遊業賠償基金索償喎。

本來呢，做生意有順境逆境，有旅行社執笠唔出奇，奇就奇在星級假期明知財務有問題仲繼續大量收客，咁就有掠水之嫌嘞。而當局明知該旅行社負債纍纍，仲准許佢繼續打開門做生意，更加係不可思議。

話時話，如果當局做好監管工作，今次懷疑掠水事件完全可以避免。正如團友話齋，星級假期欠債超過五千萬元，旅行代理商註冊處一早已經知道，但唔止無及時公布，仲續牌一個月畀佢繼續經營添。咁搞法，即係鼓勵瀕臨倒閉嘅旅行社收客掠水，將賠償基金當提款機啫，你話係咪靠害消費者吖。

旅遊業議會仲大派定心丸，話喺香港開旅行社要達到一定門檻，而且有多個監管部門把關，相信星級假期執笠只係個別事件，業界唔會出現倒閉潮喎。嗱，短短三個幾月已有三間旅行社倒閉，咁都仲話個別事件？至於講到多個監管部門把關，更加係得啖笑。係人都知，香港旅遊業之所以亂象叢生，唔係因為監管部門太少，而係太多，既有官方嘅旅遊事務署，又有半官方嘅旅遊發展局，仲有業界自律嘅旅遊業議會，可惜各家自掃門前雪，多人管等於無人管，唔出事就奇啦。當年發生惡導遊阿珍事件後，港府煞有介事展開檢討同諮詢，話要成立一個新機構統一管理旅遊事務，點知講講吓無晒下文，問你服未。

今時今日，香港旅遊業表面風光，內裏亂七八糟，外來旅客被呃被劏醜聞不絕，而本地旅行社就執吓一間又一間，叫消費者點樣選擇吖？港府口口聲聲支持旅遊發展，其實得把口嘅咋。講多無謂，食多會滯，要發展旅遊業，唔該搞好監管先喇，叮！