政壇：搞搞政：梁繼昌宣傳品涉阻街助查

立法會選舉已經係舊年九月嘅事，但立法會會計界代表、公共專業聯盟梁繼昌（Kenneth）尋日朝早十點卻忽然收到中區重案組電話，邀請佢有時間去一趟警署協助調查喎，Kenneth嚇咗一跳，了解吓先知可能同舊年選舉前一宗掛旗幡嘅事有關，咁芝麻綠豆嘅事出動到重案組﹖Kenneth認為如果只係咁就絕頂無聊，又話自己身為監警會委員，出入警局係家常便飯，但畀警方邀請協助調查都係第一次喎。

去年八月尾，臨近立法會選舉時，Kenneth嘅助手喺立法會對面嘅中信大廈天橋掛旗幡，諗住方便啲義工派單張。點知單張未派，選舉事務處已經收到匿名投訴，話Kenneth嘅宣傳品違規阻街，Kenneth惟有急急腳搵人拆番張旗幡。選舉事務處同佢講明，只要拆咗啲旗幡就會無事。點知事隔幾個月，Kenneth尋日仍然收到中區重案組電話，難怪佢覺得奇怪。

不過，Kenneth話對方講嘢尚算客氣，佢下星期會帶埋律師，同涉嫌違規掛旗幡嘅助手齊齊去警署協助調查，希望事件可以盡快了結。