政壇：發叔痰未清初二照求籤

鄉議局主席劉皇發每年農曆新年都會去沙田車公廟為香港求籤，而且仲相當重視，求籤前會先齋戒沐浴更衣。不過，自佢上個月患上感冒以來，有傳發叔多次出入醫院，但始終未有露面，因而令外界揣測佢嘅病況，更有鄉紳擔心發叔未能為香港求籤，事關唔可以冇人求籤，亦好難搵人代替佢。究竟發叔到時會否痊愈上陣？抑或帶病現身呢？

發叔近年喺新界嘅氣勢已大不如前，年前被踢出屯門鄉事委員會，到去年鄉議局換屆選舉，亦有人對其主席寶座虎視眈眈，近期因病入院，鄉郊勢力再度蠢蠢欲動。據發叔囝囝劉業強話，發叔只係剩番啲痰未清。聽聞發叔已好得七七八八，雖然未有出席公開活動同立法會會議，但每日都會返自己辦公室坐一陣，處理文件，如無意外，年初二仍然會去車公廟求籤o架。