政壇：鼠王芬嫌棄地盤工

好多行業都面臨少人入行、新血不足嘅問題。立法會尋日召開大會，其中一個質詢就係有關建造業人手不足嘅憂慮，工程界議員盧偉國提出關注，希望當局考慮為承建商提供在職培訓津貼等，唔少議員都各表意見，當中又以西九新動力立法會議員梁美芬（鼠王芬）嘅建議最搞笑，佢話家吓少新人入行，原因係地盤工人呢個名稱感覺唔好，仲話如果將地盤工人改名為「城市美容師」，咪可吸引新人入行囉！

波波唔識「接波」

鼠王芬喺立法會不時爆金句，成功連任後，由於議會內好多新丁，佢都似乎沉寂咗一排。尋日盧偉國喺立法會提到建造業人手問題，身兼行會成員嘅總商會立法會代表林健鋒更乾脆拋出輸入外勞嘅建議，避免本港大型基建因人手不足，影響質素同進度。

大家咁擔心，鼠王芬都嚟獻計，佢話地盤工人畀人嘅感覺有啲負面，或者因而吸引唔到新人加入，建議將地盤工人改名為「城市美容師」，有個靚名改善形象，咁就唔怕冇人入行喇！此言一出，發展局局長陳茂波都唔知點樣接波。

但係鼠王芬呢個建議最多只係嗌得好聽啲，無助改善地盤工種辛苦、收入唔穩定甚至較危險等弊病，就算改個名，依然係換湯唔換藥，唔通鼠王芬覺得家吓嘅年輕人咁易氹？

經過議員一輪創意十足、建設性未知嘅議論之後，陳茂波都承認，以本港未來幾年嘅建造大計，業界的確需要額外六千名「新血」，佢預計到二○一四年本地先可以完成相關人手培訓，雖然係咁，佢都明確拒絕輸入外勞嘅建議，話行內失業率仍達百分之四點四，就業不足率更達百分之七喎。