每況愈下競爭力 樞紐隨時變輸凸

好消息！調查話亞太區今年經濟好景。

壞消息！調查話香港競爭力退步。

更壞消息！亞太區發力，香港分唔到一杯羹，呢鋪隨時輸足競爭對手九條街！

唔係嚇你o架，《亞洲商業展望調查》係咁講嘅，亞太區嘅經濟增長率冠絕全球，佔跨國企業嘅整體業務愈嚟愈重。好似上年咁吖，佔咗總收入嘅兩成二，一七年仲預期升到三成二添。簡單啲講，即係跨國企業嚟緊對亞太區嘅投資有增無減。

嗱，亞太區高速增長，香港搭順風車本來有望一洗頹風o架。但可惜吖，機會只係留畀有準備嘅人，香港呢隻大懶兔今次可能又要追車尾。以上調查警告，高通脹、高生活成本、高樓價同人才不足等問題令跨國企業卻步，加上作為中國與國際之間嘅橋樑作用日漸減退，香港作為亞太區管理樞紐嘅傳統角色正面臨威脅！

係咪大鑊吖？亞太經濟一枝獨秀，香港佔唔到東風之便，反而區內樞紐嘅招牌分分鐘被一嘢吹走。試諗吓，如果區內城市趁勢發圍，而香港就斯人獨憔悴，經濟一消一長之下隨時畀周邊競爭對手拋離o架，到時香港就由區內樞紐變區內輸凸。

唉，都係嗰句，機會留畀有準備嘅人，鬼叫香港不思進取咩，明明好消息都變壞消息。其實，香港高與天齊嘅寫字樓租金會嚇窒投資者，唔使調查都人所共知，只係港府一直詐傻扮懵啫。嗱，今時今日香港最火旺嘅投資項目就係經營劏房，不如咁啦，官老爺向國際推銷吖，話唔定吸引到一兩個求財若渴跨國企業來港大展拳腳o架。

人才不足問題更加講咗十世都有，官老爺咁多年嚟做過乜嘢改善吖？莫講話資助大學學位不足，國際學校一樣學額短缺，香港學界最唔缺嘅就係目光短淺嘅官場小學雞。

至於中國窗口角色減退呢個問題咯喎，太一叮反而唔怪官老爺喎，事關隨住中國逐漸同國際接軌，呢個根本係無可逆轉嘅大趨勢。所以太一叮先至成日大聲疾呼提醒港府，香港嘅競爭優勢已經買少見少，唔好再瞌眼瞓嘞，大懶兔！

當然啦，香港競爭力每況愈下，仲有一個重要原因係以上調查無提及嘅，就係前朝特首曾蔭權爵士嘅貪腐醜聞名臭國際嘞！叮佢個鎯鎯，香港廉潔指數被貪曾搞到不停咁跌，而廉政公署居然查貪曾查到無晒下文，如果跨國企業對香港投資信心下跌，絕對可以理解囉。

一句講晒，樞紐地位不復再，香港斯人獨憔悴。大懶兔，起身喇，叮！