SUN搞作：打橫嚟講：香港政府機密檔案大殲滅

有傳媒揭發統計處外勤調查員涉嫌大規模造假，表面是有關員工為求「做得少，升職快」而揸流攤外，實情是整個監察制度失敗不堪所致，迫使到前線調查員「老實工作，畀人鬧之餘，仲會無得升」。咁畀着你的話，你會點吖？

這是個乜鬼制度？乜鬼機構嚟o架？

昨日，前統計處處長何永煊接受記者訪問時爆料，直言有政府「極高層人士」害怕「資料太詳盡」，寧願將報告「寫少啲」，即默許可以偏頗造假？咁嘅政府極高層怕乜呢？怕唔得光啲嘢，留下蛛絲馬迹，畀人追查到？

前特首煲呔不顧全港市民大力反對，都要趕在任內遷往新政府總部，大家估計佢為了貪威，一嘗新居入伙的滋味啫！估唔到，今日至明白，佢借搬寫字樓之名，策動毀滅厚度高過三棟中環國金大樓的「政府機密文件」，包括特首辦檔案和帳簿。

早前，當大家得悉政府已銷毀大量檔案時，還只會心痛失去歷史研究的資料，怎曉得有人存心毀滅證據咁粉皮！

申訴專員公署助理專員馬啟農說署方曾向政府索取檔案作調查之用，部門竟以遺失檔案為由，無法繼續追查下去，而政府交不出檔案，卻可不用承擔任何後果和責任，怪唔知得，煲呔至今仍日日印印腳，無有怕咁樣啦！

做了壞事虛怯的人，才要掩藏惡行，耍盡手段自保，但我相信上帝會替我們懲罰呢啲仆街敗類，佢哋一定走唔甩的！等天收吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府