政壇：政商定格：米蘭圓拱屋頂啟發鄭志剛

周大福嘅珠寶拍賣會就快又嚟，今年繼續由榮譽主席鄭裕彤嫡孫、執行董事Adrain鄭志剛操刀，概念就由舊年嘅法國mood到今年嘅意大利feel，同樣係由佢提供意念同珠寶設計。

Adrain話意念係嚟自意大利米蘭個著名購物商場，話說佢之前去當地旅行，抬頭望見個商場嘅彩色玻璃圓拱屋頂，突然靈感湧現，個系列叫做「OMBRE DI MILANO系列（Shadows of Milan）」，每件首飾都有一對「靈魂之眼」。兩條重頭首飾一紅一藍，紅色叫「赤紅飛行」，象徵火鶴，鑲有紅寶、桃紅、粉紅剛玉，展現夕陽雲彩漸變層次。藍色嗰條叫「湛藍躍墜」，靈感嚟自虎鯨，鑲咗極罕有嘅星光藍寶、礫背蛋白石同藏青藍寶。